【Kongner編輯室】
瘋子愷：學生校友和平示威 藍絲廢老暴力進場
話說琴晚本人睇到新聞片段，見到有位身穿全身黃色套裝嘅中年男子喺度指責示威者。佢就話：「唔好以為我著黃色就係黃絲呀！」呢句嘢聽落認真幾好笑，啱呀，做新大陸嘅「蒼藍星」都唔代表我係藍絲嫁嘛，但殊不知今朝就發生左一件令人笑唔出嘅暴力事件。
今朝唔同區嘅學校都有「和你拖」活動，而喺九龍區接近啟德新發展區嘅一間中學亦都唔例外，喺好早就已經有學生同校友於校門前連成人鏈，和平地表達訴求。呢個時候有一名手持𠝹刀同藍色衫，上身赤裸，下身穿著藍色褲嘅中老年男性到場辱罵及襲擊在場人士，造成該校老師以及校友受傷。咁我相信呢單嘢大家喺新聞都睇到嫁喇，而其實今日重有多宗針對學生罷課嘅高空擲物襲擊，導致多名學生受傷，行為極為卑鄙無恥。
有片有真相，睇返藍色𠝹刀佬呢單野。佢嘅一身造型簡直完美呼應咗琴日地鐵站果個黃衫男講嘅野。上身赤裸表現出佢好勇鬥狠嘅性格，藍色褲突顯出自己嘅政治立場，再加上佢目空一切嘅眼神，乞__人憎嘅動作，一行出來就已經入型入格。唔似得果位黃衫男咁需要特登出來表態，簡直就印證左社會學理論入面，對符號嘅研究之中，有關於"Clothing as Symbol" 嘅理論。大概就係話人著咩嘢衫出街，其實都有想表達嘅意思係入面，包括社會階層、文化以及價值觀等等。接住落嚟我哋可以從片入面睇到佢不斷以粗言穢語見人就「挑媽拆蟹」，好似一隻發情嘅玩具貴婦狗咁，見嘢就屹，再加上地方位於新型公共屋邨，合理推斷出呢位施襲者係一位典型基層藍絲廢老。
老實講，本人係無辦法理解學生同校友企喺學校前，做佢哋想做嘅嘢嘅時候，作為一個街外人又有乜咁睇唔過眼，都唔知有咩得罪佢。或者你話佢後生無機會讀書，所以都唔想人哋有書讀？見到人哋有得拖手仔佢又無得拖？咁就當然唔係啦。呢位典型基層藍絲廢老只係將自己嘅不滿，遷怒於眼前佢所見到睇落比自己弱小嘅人，係好明顯嘅弱者行為。同時，我哋亦都可以從呢件事入面睇到兩樣嘢：其一就係「和理非」需要做好心理準備，因為嚟緊你哋會面對更多呢類情況，呢一點喺開台嘅時候美茄（米迦）都講過好多次㗎喇，所以喺呢度都不作延伸；而另一樣就係證明社會嘅對立問題已遠超政府所能控制。林鄭喺上星期所做嘅所謂讓步，聲稱嘗試令反修例運動降溫，但接連發生香港各區不同種類嘅示威活動。而到左今日，好多反對運動嘅一方已經由自私自利之徒或者支持政府嘅刷鞋仔蛻變成單純對示威者單方面抱有怨恨嘅人。雖然政府嘗試喺佢「能力範圍之內」平息事件，但唔知點解總係會有啲藍絲廢老無食藥衝出來柒，激化事件對立，而且有趣嘅係，佢地自以爲自己同政府同一陣線，但事實上佢地慘變政權嘅豬隊友而不自知，呢個政權真係多得呢班人唔少喇。
不過有報導指果位典型基層藍絲廢老施襲者係因為學生叫口號嘈住佢訓覺而發癲。老實講，香港居住環境人口密度咁高，的確有時難免會受唔同嘅外在環境因素騷擾，以致無法安睡。就好似本人都唔明點解每個月都總係有幾日會有人要裝修鑽牆嘈到瞓唔到呀；樓上唔知點解會噴水落來呀等等。如果每一次都係因為咁小事就斬人嘅話，香港無數屋邨早就屍橫遍野啦。而且佢究竟有無諗過，問題嘅根源就係點解自己要住公屋，而呢個會唔會係政策問題呢？香港有咁多公屋住戶，有人會選擇忍受；有人可能會為改善生活環境而奮發圖強；亦都有人發現香港嘅住屋問題係結構性問題，無民主係搞唔掂所以先去爭取民主，但今時今日居然有一班本身已經係弱勢嘅窮人竟然助紂為虐去欺負弱小，襲擊學生？呢種係何等懦夫嘅行為！有咁嘅怒氣點解唔向當權者咆哮而要做人人喊打嘅「城中名人」呢？當然係因為佢地根本連問題喺邊都唔明白，或者唔敢去面對。唉！呢班典型基層藍絲廢老嘅人生其實真係好可悲。
最後，關於本日專欄的內容，其實本人早在上星期就決定好唔講嚴肅野，但呢幾日所發生嘅事，本人實在不吐不快，所以事實上今日呢個專欄嘅題目其實已經係改完又改，到最後就變成而家咁樣啦。無辦法啦，其他題目唯有容後再談啦。
嚟緊星期三我哋將會有我哋第一次嘅訪談節目「今晚VIP」 ，將會請嚟喺以上事件嘅參與者兼目擊者，嚟同大家分享一下佢嘅第一手資訊，記得要留意我哋今個星期三晚上嘅奧茄心事台喇！
（本欄逢周一、四更新。敬希讀者垂注）
Search